Пĕтĕм Раççейри «Чăваш ен сăррисем» фестиваль конкурсăн çĕнтерÿçисене палăртнă. Ку проект Раççей Федерацийĕн Патшалăх Думин депутачĕ Алена Аршинова пуçарнипе 2016-мĕш çулта пурнăçа кĕме тытăннă. Кăçал вăл вуннăмĕш хутчен иртрĕ. Унăн тĕп тĕллевĕ – Раççейре пурăнакан чăвашсен ăс-хакăл культурипе чĕлхине, йăли-йĕркине сыхласа малалла аталантарасси, ăна çамрăксен хушшинче анлă сарасси, ачасен пултарулăхне ÿстересси.

Конкурса хутшăнакансен шучĕ çулсерен ÿссе пырать. Кăçал йĕркелÿçĕсем 8 пин ытла тĕрлĕ номинацисене (ÿнерпе фотографи творчестви, ташăпа вокал ăсталăхĕ, литература пултарулăхĕ, тăван енпе генеалогине тĕпчес ĕç, вĕрентÿпе культура учреджденийĕсенче ĕçлекенсен професси ăсталăхĕ тата ытти те) заявка йышăннă. Ытларах Чăваш Енри муниципаллă тăрăхсенчен ĕç килнĕ. Вĕсен шутĕнче Мускав, Питĕр хулисенчен, Краснодар крайĕнчен, Тверь облаçĕнчен, Коминчен, Карелинчен, Бурятирен, Крымран та (тата ыт.те) хутшăнакансем пулнă.

Çак фестивальте Ирçе Çармăс шкулĕнче вĕренекенсем палăрнă. Константин Иванов ячĕллĕ литература конкурсĕнче 5-мĕш класра вĕренекен Соня Зубовăна çитекенни пулман, вăл пĕрремĕш вырăн йышăннă. Унпа пĕр класра вĕренекен Светлана Алексеева финалистсен йышне лекнĕ. Çамрăк вулакансене конкурса Ирина Моисеева вĕрентекен хатĕрленĕ.

Анна Михайлова