Çу уйăхĕн 9-мĕшĕнче, Аслă Çĕнтерÿ кунне паллă тунă май, Туçари культура çуртĕнче ялти хĕрарăмсен канашĕн председателĕ, «Единая Россия» партин вырăнти пуçламĕш организацийĕн ертÿçи Ираида Ильина пуçарнипе тата йĕркелесе пынипе «Çĕнтерÿ вальсĕ» ятлă кану каçĕ иртнĕ.

Нумайлăха асра ÿкерĕнсе юлнă каç клуба пуçтарăннисем иртнĕ вăрçă вăхăтĕнчи юрă-кĕвĕ çеммипе ĕмĕр манăçми вальс ташласа киленнĕ. Чун-чĕрене çĕклентерсе яракан «Çĕнтерÿ вальсĕ» те янăранă залра, вăл пурне те ташша тухма йыхравланă. Вальс çаврăннă май, ташлакан мăшăрсем иртнĕ вăрçă вăхăтне аса илнĕ, хамăрăн асаннесемпе асаттесен çамрăклăх çулĕсене куç умне кăларнă, вĕсен фронтра тата тылра кăтартнă паттăрлăхĕпе тÿсĕмлĕхне мухтакан юрăсене шăрантарнă. Кану каçĕ унта хутшăннă кашни çын чун-чĕринче чи ăшă туйăмсем вăратнă.