Йĕпреç округĕнче иккĕмĕш çул ĕнтĕ «Геройсен çемйисем» проект пурнăçланать. Унăн тĕп тĕллевĕ - паттăрлăхпа хăюлăхăн чăн-чăн тĕслĕхĕ пулса тăнă ентешсене астăвăмра ĕмĕрлĕх хăварасси, вĕсен ячĕсене вилĕмсĕрлетесси.

Проект авторĕсем - Инга Емельяновăпа Екатерина Анисимова - хăйсем пуçарнă кирлĕ ĕçе малалла тăсаççĕ, ятарлă çар операцийĕнче паттăрсен вилĕмĕпе пуç хунисен сăнĕсене çывăх çыннисемпе пĕрле ÿкерттерсе илсе, портрет хыççăн портрет тăваççĕ.

Сăнÿкерчĕксен пуххи - чăн-чăн патриот-воинсен паттăр  ячĕсене, çемье хаклăхĕсене упракан истори пĕлтерĕшлĕ экспозици. Аслă Çĕнтерÿ кунĕнче унпа халăха Йĕпреçри  Культура аталанăвĕн центрĕнче паллаштарнă. Халĕ ăна этнографи музейĕн çар мухтавĕн пÿлĕмĕнче вырнаçтарнă, çитсе курăр.