Пучинке территори пайне кĕрекен ялсенче ĕлĕкренех пыракан ырă йăла пур% çулталăкра икĕ хутчен - çуркуннепе кĕркунне - масарсенче тирпейлĕх тăвас тĕллевпе субботниксем ирттересси.

Акă иртнĕ кунсенче те ял-йыш тасалăх акцине йĕркелеме калаçса татăлнă. Палăртнă кунсенче, юпа уйăхĕн 4-5-мĕшĕсенче, Пучинкепе Савккара тата Çĕнĕ Кĕлĕмкассинче пурăнакансем çăва çинче тăрăшса ĕçленĕ, йывăçсенчен тăкăннă çулçа, хăрăк туратсене касса, тип курăка çулса ытти ăпăр-тапăрпа пĕрле тиесе тухнă.

Туслă ĕçре вăхăт иртни те сисĕнмест, ĕçĕ те кал-кал пырать. Икĕ кун вăй хунă хыççăн масар çинче йĕркелĕхпе тирпейлĕх хуçаланма пуçланă, çавна май ĕçчен çынсен кăмăлĕ тулнă.