Округри кашни ялпа поселокрах астăвăма ĕмĕрлĕх упракан паллă вырăнсем пур, çавсене пăхса, тирпейлесе тăрасси ачасен тивĕçĕ пулса тăнă тесен те юрать. Шкулта вĕренекенсем палăксен йĕри-таврашĕнче çирĕп тасалăхпа йĕркелĕх хуçаланччăр, клумбăсенче чечексем ешерсе илем кÿччĕр тесе нумай тăрăшаççĕ.

Çакна Чăваш Тимешри Тăван çĕршывăн аслă вăрçин паттăрĕсене чысласа лартнă палăка пăхса-тирпейлесе тăракан ачасен ырă ĕçĕ те тепĕр хут çирĕплетрĕ. Ыттисене лайăх тĕслĕх кăтартса, активистсен пĕр ушкăнĕ иртнĕ кунсенче уроксем хыççăн обелиск патне васканă, пурте пĕр тĕллевлĕ пулса кунти тавралăха çÿп-çапран, кивĕ çулçăсенчен, курăкран тасатнă.