Тымар поселокĕнчи Ильинсем çемьен 50 çулхи юбилейне паллă турĕç.

Çур ĕмĕр пĕрле шăкăл-шăкăл пурăнаççĕ Леонид Ивановичпа Елизавета Николаевна. Çемье вучахне чĕртнĕренпе чылай вăхăт иртнĕ пулин те, таса туйăмсем паян та сÿнмен вĕсен чĕрисенче. Пĕр-пĕрне ăнланса, хисеплесе, пулăшса пыраççĕ вĕсем.

Ильинсем виçĕ ача çуратса ÿстернĕ, вĕсем вара ашшĕпе амăшне çичĕ мăнук парнеленĕ. Пушă вăхăта усăллă ирттерме тăрăшаççĕ Леонид Ивановичпа Елизавета Николаевна. Кун-çул уттинчен юлмаççĕ, ял пурнăçне те хастар хутшăнаççĕ.

Сумлă уявпа мăшăра Шăрттан территори пайĕн пуçлăхĕ Александр Саперов тата «Улах» фольклор ушкăнĕ саламланă. Хăнасем çирĕп те туслă çемьене туйăмсене, пĕр-пĕрне малалла та упрама, çамрăксене ÿлĕмрен те ырă тĕслĕх кăтартса пыма, ырлăхлă-сывлăхлă пурăнма, яланах хастар та савăнăçлă пулма, ачасемпе мăнуксенчен пархатар курма суннă.