Пуш уйăхĕн 7-мĕшĕнче Çăкалăх шкулĕнче Хĕрарăмсен кунне халалласа уяв иртрĕ.

Зала шкул ачисем, учительсем, ачасен амăшĕсемпе асламăшĕ-кукамăшĕсем кăна мар, ятарлă çар операцинче тăракан салтаксен амăшĕсем те пуçтарăнчĕç. Чи малтанах шкул директорĕ Александр Кошелев сăмах илчĕ. Вăл пурне те Мартăн 8-мĕшĕ ячĕпе саламларĕ. Салтак амăшĕсене чечекпе пĕчĕк парне парнелерĕ. Чăтăмлăх, сывлăх, ăнăçу сунчĕ. Унтан концерт пуçланчĕ. Кĕтнĕ куна кашни класах тĕплĕн хатĕрленнĕ. Чи малтан сцена çине 2-мĕш, 4-мĕш классем тухрĕç. Вĕсем хаваслă ташă парнелерĕç. Улттăмĕшсемпе саккăрмĕшсем хитре юрăсем юрларĕç. Пиллĕкмĕшсем чуна тивекен сăвăпа савăнтарчĕç. 1-мĕшсемпе 3-мĕшсем юрларĕç те, ташларĕç те. Тăххăрмĕшсем вара саламлама ятарласа видеоролик хатĕрленĕ — ăна кăтартса пурне те хаваслă кăмăл-туйăм парнелерĕç.

Юлашкинчен пуçтарăннă хăнасене сĕтел хушшине чĕнтĕмĕр. Салтак амăшĕсем хăйсене хисепленсе сума сунишĕн тав турĕç. Çамрăк ăрăва çирĕп сывлăх сунчĕç. Тĕлпулу кăмăллă иртрĕ.

Мария Орлова,

çăкалăх шкулĕ