Çак акцие кашни ял тăрăхĕнчех хутшăнчĕç. Ятарлă çар операцине кайнă салтаксен амăшĕсене çурхи ăшă уявпа - Хĕрарăмсен кунĕпе саламласа шкул ачисем чечексем парнеленĕ. Çĕршыва хÿтĕлеме юрăхлă хастар та хăюллă ывăлсем çитĕнтерсе ÿстернĕшĕн ăшшăн тав тунă, ырлăх-сывлăх тата тăнăçлăх суннă.

Паянхи çăмăл мар лару-тăрура пурин те пĕр шухăшлă пулмаллине, ятарлă çар операцине хутшăнма тухса кайнисен çемйисене май килнĕ таран тимлĕх уйăрмаллине, вĕсене ĕçпе те, ăшă кăмăл-сипетпе те пулăшмаллине шкул ачисем те питĕ лайăх ăнланаççĕ. Çавăнпа та «Паттăрсен амăшĕсене – чечексем» акцие хаваспах хутшăннă ачасемпе çамрăксем.

Акă Пучинкери шкулта пĕлÿ илекенсем чечек çыххисем йăтса ялти кашни салтак амăшĕ патне киле пырса савăнтарнă. Чун-чĕререн тав тунă ачасене хĕрарăмсем. Пысăк Упакасси шкулĕнче вĕренекенсем салтак амăшĕсене хăйсем патне шкула хăнана чĕннĕ. Хĕрарăмсене чечек çыххисем, пĕчĕк парнесем парнеленĕ тата уяв концерчĕ лартса панă.

Анна Михайлова