Чăваш кĕнеке издательстви пĕлтернĕ тăрăх, юлашки виçĕ уйăха илсен, «Эпĕ чăвашла вĕренетĕп. Я учу чувашский язык» чăвашла-вырăсла калаçу кĕнеки пуринчен ытларах сутăнакан кăларăм пулса тăнă.

Практика кăларăмне Тамара Артемьевăпа Галина Брусова хатĕрленĕ, Надежда Вечеркина редакциленĕ. Кĕнеке тĕп тĕллевĕ - чăвашла калаçнине тăлмачсăр ăнланма пуçласси.

Кăларăм 27 занятирен тăрать. Кашнине ăша хывма 2 сехет кирлĕ пулать. Малтан фонетика пайĕ, кайран ударени правилисем, падежсем, местоименисемпе хисеп ячĕсем.

Теорие хăй тĕллĕн пурнăçламалли ĕçсемпе тата вуламалли текстсемпе пуянлатнă. Ансат калаçăва йĕркелемешкĕн вĕренме  кирлĕ грамматика та пур.