Çу уйăхĕнче Йĕпреçрен Канаш хулине тата каялла пассажирсем илсе çÿрекен 305 номерлĕ обществăлла транспорт çÿреме тытăннă. Ăна «Пурнăç валли инфратытăм» наци проекчĕпе килĕшÿллĕн хута янă. Вăл Чăваш Республикинчи муниципалитетсем хушшинчи транспорт çыхăнăвне аталантарамалли программăн пĕр пайĕ пулса тăнă.
Мĕн пĕрремĕш кунтанах çак маршрут çăмăллăх панине çынсем туйма пултарнă. Автобус Йĕпреç тĕп больници умĕнчен тапранса каять те Канаш хулинче Никольски чиркĕвĕ патĕнче чарăнать.
Çынсене илсе çÿренĕ чухне хăрушсăрлăх - чи пĕлтерĕшли. Хальхи йышши транспорт шал енчен хăтлă. Çынсене кĕрсе ларма меллĕ пултăр тесе салон урайĕсем аяллă, тĕревленме, тытăнса пыма порученьсем вырнаçтарнă, креслисем çемçе, çыхăнмалли пиçиххисем пур, салонра кондиционер ĕçлет.
«Кашни кунах расписанипе килĕшÿллĕн тапранса каятпăр. Пушăлла кайни-килни пулман, çынсем çÿреççĕ», - терĕ Виталий Ядрицов водитель.
Транспорт ыйтăвне татса пани çынсене, чăнах та, савăнтарать. «Канаша çитсе килме халĕ питĕ меллĕ. Хулана кайсан каялла мĕнпе таврăнмалли пирки шикленместĕн - кашни сехетрен тенĕ пекех автобус пур. Билет хакĕ те ти-вĕçтерет», - терĕç салонра ларакансем.
Йĕпреç-Канаш трасса çывăхĕнче вырнаçнă ялсенче пурăнакансем те 305-мĕш номерлĕ автобус хута кайни çула тухса кайма, çитес çĕре хăвăрт çитме хăтлă транспорт пулăшнине палăртаççĕ.
Чÿк уйăхĕнчен пуçласа 305-мĕш маршрутăн расписанийĕ улшăнчĕ. Йĕпреçрен (тĕп больница умĕ) вăл халĕ 05:50; 06:50; 08:00; 09:00; 10:00; 11:00; 12:30; 13:30; 14:30; 15:30; 16:30; 17:30 тапранса каять.
Канаш хулинчен (Никольски чиркĕвĕ): 06:25; 07:30; 08:30; 09:30; 10:30; 11:30; 13:00; 14:00; 15:00; 16:00; 17:00; 18:00 çула тухать.
Анна Евграфова
Ноябрь 2026 |
